7.08.2006

aral sa kakulangan

sa bawat labas ko ng aking pitaka, kirot sa aking puso ang nadarama. butas na bulsa ang tanging nakakapa at ilang baryang karamiha’y mga may ulo pa ni rizal. maging ang pambayad pamasahe sa mga traysikel at dyip ay pilit kong tinitipid. kadalasan, sa halip na sumakay ay maglalakad na lamang. mas pipiliin na lamang na maglakad, kalyohin at paltusin man ang aking mga talampakan, basta’t makatipid kahit ilang barya lamang.

sa hirap ng buhay, kahit bente-singko sentimo na makita sa daan ay aking pinupulot. ito’y mahalaga. pilit kong tinitipid ang mga bagay na maaaring matipid.

sa bawat pagtaas ng mga bilihin, sumisikip ang aking dibdib. ako’y natataranta at sabay kukuha ng kalkulador. isa-isang bibilangin ang mga gastusin at bayarin.

tuwing ako’y namimili, pilit kong kinukulit ang mga tindera upang ako’y makatawad ng lubos. susuriin ang bawat pinamili at titiyaking mga mahahalaga lamang ang mga nabayaran. at dahil sa kakapusan, ako’y natututong mag-isip. ako’y natutong magtipid at maging matalinong mamimili.