9.05.2005

tulad ng isang pulang rosas sa hardin

tulad ng isang pulang rosas sa hardin
maraming humahanga't nahahalina
sa ganda't halimuyak na kanyang taglay
---
tulad ng isang pulang rosas sa hardin
na napalilibutan ng damo't dumi
kahit sa iisang lupa nakatirik
lumilitaw ang tunay na angking ganda
---
tulad ng isang pulang rosas sa hardin
sa biglang tingi'y ordinaryong rosas lang
mamulamula't nakagagaan tingnan
---
tulad ng isang pulang rosas sa hardin
akala mo'y walang problema't masaya
ngunit ang mga sakit niya'y nakatago
nababalot sa matatalim n'yang tinik
---
tulad ng isang pulang rosas sa hardin
mahalin man ng bubuyog ay 'di sapat
angkinin man ng mga tao ay 'di dapat
---
tulad ng isang pulang rosas sa hardin
hipan man ng hangin ay 'di malalaglag
pilit susunod sa hampas at babalik
muli, siya'y nakatayo at nag-iisa
---
tulad ng isang pulang rosas sa hardin
tunay na may ganda saan man ilagay
may ibig sabihing hindi man mawari
---
tulad ng isang pulang rosas sa hardin
sa plorera man, baso o plastik lamang
saan man ilagay, babagay kailan man
pagka't ganda niya'y natatangi lamang
---
tulad ng isang pulang rosas sa hardin
hindi mo maiintindihan ng lubos
hangga't hindi mo iibigin ng lubos