7.02.2005

sa loob ng puso ko'y ikaw pa rin

akala ko'y wala ka na, naglaho na nang tuluyan sa isipan ngunit ika'y nanatili at kasalukuyang nanggugulong muli.

ika-labintatlong buwan na ngayon nang tayo'y huling nagkita. marahil ay marami na ngang nagbago sa ating dalawa ngunit hindi ang nararamdaman ko para sayo. ito'y nanatili at nananatili hanggang sa kasalukuyan. akala ko'y naglaho ka na, akala ko'y nabura ka na sa aking puso't isipan ngunit sa isang iglap, ika'y nagbalik. sa isang banggit ng iyong 'ngalan, nagising ang alaala mong matagal nang natahimik. natanto kong ika'y 'di nagpaalam.

sa puntong ito'y para bang gusto kong bumalik sa nakaraan. sa mga panahong tayo'y magkasama pa't masaya..nasisilayan ka, nakakausap, nadarama. ibang iba kung ikukumpara sa kasalukuyang sitwasyon. anino mo'y aking hinahanap-hanap, ngiti mo'y pinaiikot sa gunamgunam at kamay mo'y inaalala sa pamamagitan ng unan kong yati sa bulak. tunay ngang nakakaramdam ng pangungulila at pananabik..sa ating muling pagkikita--walang katiyakang kailan darating ang tagpong ito.

minsa'y ako'y nagtataka, kamusta ka na kaya? ikaw ba'y masaya o tulad ko ring nagtataka? ikaw ba'y katulad kong nananabik o sadyang walang pakialam sa akin at sa atin? ako ba'y iniisip kahit saglit o nilimot nang tuluyan? kung anu man, ako'y nasasaktan at nag-aalala pa rin.. sayo, sa iyong mga ginagawa at sa iyong kalagayan.

mahal kita at malamang alam mo na ang bagay na 'to. kung sakaling itatanong mo pa rin kung gaano, kinalulungkot kong sabihing hindi ko masasagot yan. mahal kita, magmula nang malaman ko ang iyong pangalan hanggang sa mga oras na ito, kahit matagal na'ng nagdaan, masasabi kong hanggang sa pintuan ng langit pa rin ang pagmamahal ko sayo. pakiusap, huwag ka nang magtanong, mahal lang talaga kita.

nagkamali akong ika'y pinilit kinalimutan. hindi ko inasahang ikaw pala ang nagtutustos sa pang-araw-araw na pangangalangan..aking hiniga, dugo at pawis. ganyan kita kamahal..umabot na sa sukdulan. pagmamahal na hindi maipaliwanag at hindi maipahiwatig, sadyang totoo at hindi na dapat ulit ulitin pa.